Trouz er gêr

E-pad an dibenn-sizhun e vo dalc'het pevarzekvet saloñs al levrioù evit ar yaouankiz e bro Montroulez. Aozet e vez an darvoud-se gant "La Baie des Livres". Kristian ar Braz a gaso un daol-grenn diwar-benn al lennegezh e brezhoneg evit ar re-yaouank disul e kreizenn "Le Roudour". Pedet e oa ar skrivagner da gaozeal eus e labour gant liseidi Tristan Corbière dec'h.

"Eskemm, Quêteurs de mémoire en Bretagne" gant Roudoù Editions a zo levr nevesañ Pierrig Mellouet hag Albert Penneg.
Alies n'eus bet tro Pierrig, kelenner e vicher, da aozañ kejadennoù etre tud yaouank ha tud kozh. Bet un digarez da gaozeal diwar-benn traoù a bep seurt: ar relijion, ar skol, c'hoarioù ar vugale, ar vrezel...
Diwar-se eo ganet levr "Eskemm".
Ul levr da lenn ha da selaou.
Gant Karolina.

Deiziataer an dibenn-sizhun :
? Foar ar pladennoù a vo dalc'het disul e Plougerne. Yvonne Le Maréchal a fardo krampouezh an devezh-se. A-youl vat emañ-hi gant ar gevredigezh "France Alzheimer" ivez. Ur sonadeg da rastellañ arc'hant evit ar gevredigezh-se a vo d'an 23 a viz Du gant "Paotred Pagan" e Plabenneg. Kanañ a ra Jean-Michel Deniel el laz-kanañ-se.
? Fest bier Gwitalmeze a vo dalc'het disadorn ha disul, muioc'h a zisplegadennoù gant Aurélie Koum eus ar gevredigezh "Ar Viltañsoù" a aoz ar gouel-se. Dre bellgomz emañ ganeomp.
Embannet eo an abadenn gant Maëlys Poublanc

E-pad vakañsoù an Holl-Zent oa bet kinniget gant Gaelle Maudire ur staj da zesliñ ober margodennoù gant teknik ar c'hantennerezh troidellek.
Klevet 'vo ivez bugale , bet o kemer perzh er staj: Avel, Sacha, Lili hag Aodren.
En abadenn 'vo ivez "Emgann Kergidu"gant Dominique Thépaut, hag "Alc'hwezhioù brezhoneg" , troioù lavar an amzer gant Mikeal Madeg.
Gant Karolina.

Digoret 'vo an abadenn gant "alc'hwezioù brezhoneg " ha troioù-lavar diwar-benn an amzer gant Mikael Madeg.
Goude-se e talc'himp gant ar gaoz gant levr nevesañ Roger Bossard diwar-benn tud Gwinevez da boent an eil brezel-bed. Daou bennad a zo ivez 'barzh al levr skrivet gant Herve Peaudecerf oc'h anv eus daou garr-nij pillet d an traoñ d'ar mare-se.
Klozet 'vo gant trede lodenn "Emgann Kergidu" kinniget gant Dominique Thépaut.
Gant Karolina

Buhezour eo Benjamin Toupin en Ulamir-CPIE pe Unvaniezh lec'hel buheziñ ar maezioù ha kreizenn bad a intrudu evit an endro e bro Montroulez-Treger. Kinnig a ra atalieroù diwar-benn ar mor hag an endro da skolidi ha da dud deuet a zo o chom war ar maez.
Embannet eo an abadnen gant Maëlys Poublanc

"Les Plounéveziens dans la tourmente de la seconde guerre mondiale", setu levr nevesañ Roger Bossard savet diwar enklaskoù graet gantañ hag ivez diwar testenioù dastumet gantañ.
Hiziv en abadenn 'vo roet ar gaoz da Jean Goaoc, ganet e 1937, neus bet tro da gontañ e eñvorennoù da Roger Bossard.
Gant Karolina.

Fenoz e vo dalc'het an trede "JAM", un abadenn aozet gant ar gevredigezh "Marée Mauve" e Landerne. Kregiñ a raio an darvoud gant ur "blind-test", da lavaret eo ur c'hoari sonerezh, ha da c'houde e sono ar strolladoù folk, rock ha punk Manon et Côme, Swansea ha Sardin Destroyed. Paol Moreau a roio lusk d'an nozvezh-se en davarn "Blackrock".

A-raok ar vakañsoù o doa aozet skolaerezed skol Diwan Gwitalmeze un devezh "hep sac'h skol". Da lavaret eo e oa kinniget atalieroù ha c'hoarioù kaset gant tud a-volontez vat d'ar vugale. Reportaj war blas gant Véronique a zo skolaerez, gant Solañj, Soaz, Marie-Christine ha Mikeal, tud a-youl vat eus kevredigezhioù eus ar vro, ha gant ar vugale, evel-just.
Kaset eo ar pennad-kelaouiñ gant Maëlys Poublanc

- 24 000 den o deus sinet, nevez zo, ar sinadeg evit ma vo anveet Kerne-Veur evel unan eus ar pemp broad ‘ya d’ober Rouantelezh-Unaned. Muioc’h a zisplegadennoù gant Morwena Jenkin, kerne-veuradez anezhi, a heuilh a-dost politikerezh he bro… Emañ gant Erwan Blanchard.
- Evit ar wech kentañ eo bet sinet ar garta "Ya d'ar brezhoneg" gant ur skol ijinerezh. E-touez an obererezhioù kinniget gant Ofis publik ar brezhoneg e kinnigo kentelioù war ar brezhoneg an ISEN, ur skol ijinerezh hollek e Brest, adalek 2026. Jean-Marie Guyader, eilprezidant an enklaskoù ha Yann Riou, kelenner war ar jedoniezh a zispleg deomp perak e fell d'ar skol lakaat ar brezhoneg war-wel.
Embannet eo an abadenn gant Maëlys Poublanc