Trouz er gêr

Graet 'vo anv gant Maïna ar Gars eus daou film a c'heller gwelet er mare-mañ er "salioù du": "Temps Mort" gant Eve Duchemin ha "Chien de la casse" gant Jean-Baptiste Durand.
Daou film peurijinet er "Groupe Ouest" e Plouneour-Brignogan, ul lec'h da vroudañ ar sevel senarioioù ma teu senaristed eus Europa a-bezh.
Hag ez aimp pelloc'h gant ar gaozeadenn kaset da-benn gant Rozenn Vilin diwar-benn he zezenn "Du sabot au crane de singe" . Da geñver "Kafe Brezhoneg", aozet gant "Ti ar Vro-Leon" ha "Dastum Bro-Leon".
Gant Karolina.

Da geñver "Kafe Brezhoneg" oa bet pedet Rozenn Vilin da ginnig danvez he zezenn "Du sabot au crane de singe" ha displegañ d'an dud penaos eo deuet da vezañ yezh an holl, ar brezhoneg, yezh ar vezh.
Ha goude 'vo gouezet muioc'h diwar-benn an abadenn "Les géantes" gant ar strollad "Duo du bas" hag a oa deuet e Landerne evit kinnig ur sonadeg. Klevet 'vo ar ganerez Elsa Corre.
Gant Karolina.

E vamm-gozh a lavare e oa ganet Goulven Loaeg e-touez ar bezhin. Sur-mat eo gwir ar vojenn pa weler an arzour eo deuet da vezañ hiziv. Abaoe tost dek vloaz e sav Goulven Loaeg kalvar "ar vezhinerien" e Korejoù e Plougerne gant daou gizeller hag ur gizellerez all. Bep bloaz e tigor an arzour e atalier d'an arvesterien. Livañ a ra an aod, ar reier hag ar bezhin.

Un abadenn kinniget gant Maëlys Poublanc

Betek fin miz Mae 'vo da gaout e ti-kear Plouider un diskouezadeg diwar-benn istor fest ar vezhinerien aozet bep eil bloaz e Plouneour-Trez. Un digarez en abadenn da c’houzout muioc'h diwar-benn istor ar vezhinerien gant Ogust ar Borgn, bet bezhiner ha bet ivez e-touez an dud o deus roet lañs d'ar fest-se e 1976.
Gant Karolina.

D'ar Sul 21 a viz Mae e vo dalc'het kampionad Breizh al lazoù-kanañ e Landerne. Pemp laz-kanañ eus Breizh a-bezh a gemero perzh ennañ. Yann-Bêr Thomin, prezidant kengevredigezh "Kanomp Breizh", a ginnigo istor ha reolennoù ar c'hampionad.
Un abadenn kinniget gant Maëlys Poublanc

Echu eo gant Kann al loar, ar festival a veze dalc'het e Landerne bep hañv abaoe 1987. Yann-Bêr Thomin, unan eus savourien gentañ ar festival, a responto da goulennoù Erwann Blanchard diwar-benn an diviz-mañ.
An abadenn-mañ, gwisket gant dielloù Arvorig FM, zo kinniget gant Maëlys Poublanc

D'ar Sul 14 a viz Mae e vo Gouel ar c'hezeg e Treouergad. Kalz a abadennoù war tem ar meurlarjez a vo kinniget d'an arvesterien ! Klevet e vo Lucien Konk ezel eus oaled ar maezioù a aoz ar gouel ha Reun Treger, aotrou maer Treouergad.
Poltred : Reun Treger ha Lucien Konk e lec'h ma vo dastumet patatez e-pad ar gouel.

Bep Merc'her kentañ ar miz e vez kinniget ur "repair kafe" gant ar gevredigezh "Un peu d'R" e Brest. Kristian Mercier a zisplego deomp e labour gant ar gevredigezh ha penaos e skoazell an dud da gempenn o mekanikoù da wriat.
E eil lodenn an abadenn e vo klevet ur pennad-kaoz gant Mithé Emiry genidik eus Gwiglann. Eizh vloaz ha pevar-ugent eo. Kontañ a raio deomp he buhez war ar maez, ur vuhez didrouz gant eontred ha moerebed bouzar... Hag e lakao ar gaoz war he flijadur vrasañ : dañsal !

Ar bloaz-mañ e teuio da Blabenneg da geñver sonadeg "Kerfolk" , tud ar strollad "Tempest", ur strollad sonerezh nevez, bet bodet ennañ sonerien ampart eus Bro-Iwerzhon hag ur ganerez ivez.
Klevet 'vo Bernez Jentil , unan eus aozerien "Kerfolk".
Ur gontadenn 'vo ivez, "kontadenn Sant Tibidio" gant Mikael Konk, enrollet 'pad ur veilhadeg 'oa bet aozet e miz Ebrel e "Strollad ar Vro Bagan".
Gant Karolina

Ebenour eo Alan ar Penneg, bet digoret e atalier gantañ n'eus ket pell zo e Gwitalmeze.
Anvet eo e stal "Atalier Kalon". Kalon a zo ivez an anv roet da greiz ur c'hef.
A bep seurt 'vez graet gant Alan : arrebeuri, c'hoarioù koad, kinkladurioù…diouzh c'hoantoù ha goulennoù e bratikoù.
[https://www.atelierkalon.fr/br] (https://www.atelierkalon.fr/br)
En abadenn 'vo graet anv ivez eus raktres "Dastum Bro-Leon" ha "Dastum Breizh" diwar-benn Line Marne, ur ganerez vrudet e Plougerne". Danvez ul levr-pladenn a vo embannet en dastumad "Tradition vivante de Bretagne".
Kinniget gant Karolina.