Kreiz Mintin

Klevet vo div atersadenn diàr-benn ar skol. Da gentañ e vo klevet Christian Badezet ha Mari-Lou Pochic, aterset get Monik e 1997 a-ziàr skol divyezhek Ploue, hag àr lerc'h e vo klevet Catherine Pasco, aterset get Marie-Laure Groix e 1999, é tisplegiñ perak ha penaos he deus graet skol d'he bugale er gêr.

A-c'houde ur blead bremañ 'd eus ket mui moaian gober filajoù... hag an dra-se a vanka deoc'h, marse ? hama, hiziv e kennigan deoc'h selaou doc'h istoerioù 'oa bet kontet get Pierre Bacon, doc'h mikro Marie-Laure Groix, e 1998.

Bourrabl a vez pa vez klevet istoerioù kontet mat, 'd eo ket gwir ? Hama, hiziv e vo klevet istoer "maget pell", a oa bet kontet get Daniel an Doujet e 1998. Hag àr-lerc'h e vo klevet ur pennad komz get Pier Nignol, François Louis ha Daniel an Doujet, a oa doc'h mikro Marie-Laure Groix é tisplegiñ penaos ha get piv o deus desket an istoerioù a vez kontet gete.

Hiziv e vo klevet div atersadenn a-ziàr Kerne-veur. Klevet vo Christian Hémonic é komz ag ar gevelladur etre Sant-Turiav ha Carlstock, ar vro, an dud, ar boued... hag àr-lerc'h e vo klevet Albert Boché é komz ag ar vro-se ivez : ar maezoù, an aod, an dud, an anvoù-lec'h, ar yezh gerneveg, ar manez Sant-Mikael a zo du-se, hag ar Saozon er vro.

Hiziv en abadenn Kreiz Mintin e vo klevet Jean-Luc Le Guen, anavetoc'h dre e voranv « Chichille », a oa marc'hadour pesked e Kaodan. E 1999 e oa bet aterset get Marie-Laure Groix, he devoa dihunet kourz da vintin evit monet asambl getoñ d'an Oriant, da breniñ pesked er porzh-pesketa, da gargiñ skorn en oto, ha da vonet betak Kaodan da werzhiñ ar pesked. Chichille en devoa komzet geti a-ziàr e vicher.

Dimeurzh e oa Malarde, ha dec'h e oa Merc'her ar Ludu... Ya met petra eo an traoù-se ? A-venn e taont ? Ha petra veze graet an deizioù-se e-raok ? Setu ar pezh a vo displeget deomp get Jude Paboul, a oa bet aterset get Monik ar Boulc'h e 1991. Hag àr-lerc'h e vo klevet un istoer tennet ag ar levr « a liv ar loar hag ar stered ». Er levr-se vez kavet istoerioù a oa bet kontet get Stefani Gwilhom e Porzh-Loeiz, etre 1913 ha 1916, ha dastumet get Iwan an Diberder. Skipailh Radio Bro Gwened ha tud a vro bPorzh-Loeiz o deus en em lakaet d'añrejistriñ (enrolliñ) an istoerioù-se ar blez paset, ha tuchant e vo klevet un istoer anvet « ar siren gouliet get ar rekin er c'hoad tailh », kontet get meur a zen, enrollet get Benoit Allaire, ha frammet get Jeanne Chevrel.

Hiziv eh aomp da vale asambl get Jañ-Pol Runigoù e Kervignag. Andrea ar Gall ' oa bet é ober un droiad getoñ e karter an Treizh, àr vord ar Blavezh. Jañ-Pol en doa komzet ag ur bochad traoù liammet get an tachad-se : an diforc'h a oa etre tud ar c'harter-se hag an dud arall e Kervignag, penaos en deus chañjet ar c'harter bremañ, Tavarn ar Vretoned, ar valtouterion a veze aze betak ar brezel, an treizh kozh, ar sonennoù a-ziàr tud hag a zo bet beuzet er Blavezh gwezharall, bered ar bagoù kozh, hag ur bochad traoù arall c'hoazh.

Dec'h e oa Gouel Sant Dewi, gouel broadel Bro-Gembre. Just a-walc'h, hiziv eh aomp da selaou doc'h Germaine Chevillard, a oa bet aterset get Marie-Laure Groix e 1997 a-ziàr ar boaiajoù he deus graet er vro-se. Ha goude e vo komzet a-ziàr Bro-Iwerzhon get Momo Jouanno, a zo bet é chom hag é labourat er vro-se e-pad seizh vlez. Komzet vo ag ar skolioù, ar yezh iwerzhoneg, an tele, ha traoù arall c'hoazh.

Hiziv eh aomp d'ar Vro Pourlet hag eh aomp da selaou doc'h Marcel Jaffré, a oa bet aterset get Merwyn Sauerbrey e 2011 a-ziàr an amzer gwezharall e parrez Sant Karadeg Tregomel. Hag e achumant an abadenn e vo klevet un istoer hag a oa bet kontet get Stefani Gwilhom e Porzh-Loeiz e 1913. An istoer-se, a zo anvet « Ar verc'h hag an daou ozegan », a zo bet kontet hag enrollet e 2020 get tud ag ar radio hag ur skipailhad tud a-volantez vat : Enora Molac, Benoit Allaire, Brewal Runigoù, Momo Jouanoù, Gregory Evenas, ha me, ha frammet get Jeanne Chevrel

Hiziv eh aomp da Bloue, hag eh aomp da glevet Herri ar Borgn, a oa bet aterset get Merwyn Sauerbrey e 2012 a-ziàr ar levr « Brezhoneg ar Skorf » a oa bet skrivet getoñ hag embannet get Skol Vreizh e 2011.