Peoc'h ba'l loch !

Trugarez vras da Gi Yonkour da vezañ komzet demp eus ar c’hleñved a vez graet DNB deusañ gantañ, an Dermatose Nodulaire Bovine pe dermatoz nozelek ar saout en brezhoneg. Bet e oa enrollet ar gaoz-mañ e-kreiz miz Kerdu 2025 hag eo bet skignet war ar gwagennoù evit ar wezh kentañ d’ar 16 a viz Genver 2026…

"Bastard", ur gunujenn hag un tabou pulluc’het war al leurenn...
« Bastard » sell aze unan eus krouidigezhioù [Teatr Piba] (https://www.teatrpiba.bzh/project/bastard-2025/) bet c’hoariet dirak an dud evit ar wezh kentañ e miz Du 2025.
Bet eo Kristof ar Menn o tispenn roudoù e amzer gentañ, o klask e sevenadur, o klask kanaouennoù hengounel met ivez o klask goût piv e oa e dad pe kentoc’h o klask goût 'blam da betra ne oare ket piv oa e dad.
Ur veaj da gompren e-barzh an traoù koachet, adalek un ti ar re gozh e Landreger betek e-kreiz un tourmant erc’h er c’helc’h artikel.
Pennad-kaoz gant Krismenn a gomzo demp ivez pelloc’h eus ar raktres european « Phōnē : giving minority langages a voice », unan eus andonioù an abadenn "Bastard".
Ur pennad-kaoz enrollet e miz Kerdu 2025 gant Tomaz Laquaine-Jakez
(Poltred Teatr Piba/Sébastien Durand)

Un teskad kinnigoù politikel evit Lannuon Treger Kumuniezh (LTK) a oa bet embannet en diskar-amzer 2025 gant tud Unvaniezh Demokratel Breizh, re kevrennoù Lannuon-Perroz ha Landreger.
C’hoant gante broudañ an dud da zebatiñ, da gontañ kaoz an eil re gant ar re all ac’hann d’ar votadegoù kêr a vo e miz Meurzh 2026. Un dastumad mennozhioù sklaer evit ma c’hellfe ar sitoaianed lâret o soñj ha kaout krog war ar politikerezhioù publik kaset gant ar gumuniezh tolpad-kêrioù.
N’eo ket ur programm klok a zo propozet aze gante met un nebeud mat a ginnigoù resis war meur a zachenn : al lojañ, ar brezhoneg, ar sevenadur, an traoù savet pe c’hoazh al labour-douar hag an energiezh.
Danvez prederiañ ha kaozeal evel a glevfet en abadenn-mañ gant daou zen eus UDB, Nil Kaouisin ha Herve Latimier, koñsailher e kuzul LTK, a lavar demp da voulc’hañ an dorzh pelec’h emañ an dalc’h gant an etrekumunelezh...
Un abadenn enrollet e miz Du 2025 gant Tomaz Laquaine-Jakez
(Poltred gant Le Peuple Breton)

En abadenn-mañ e vo rentet un tamm enor da zaou zen o deus merket tud kreiz Breizh hag a oa aet d’an anaon e penn kentañ miz Kerdu 2025.
Jean an Alour oa aet diouzhomp d’ar 6 a viz Kerdu 2025. Un enor fromus oa graet dezhañ dirak iliz Skrigneg gant ur gavotenn evel-just ("Stokomp hom zreid deuzh an douar ken a greno an arched-mañ!"). E-pad bloavezhioù e oa bet an den o teskiñ d’an dud paz Kalanel just a-walc’h !
Feliks Leizour oa marvet d’an 8 a viz Kerdu hag eo bet a-viskoazh ur politikour chomet gwriziennet en e vro c’henidik.
O-daou e oant bet ganet e Plourac’h, ur gumun vihan eus bro Gerne, damdost da Gallag.
Da gomz diwar o fenn omp bet o konto gant un den bet ganet evelte war barrouz Plourac’h… Emgav a oa lakaet e ti-kañv Kallag e lec’h m'emañ Yannig Larvor o labourat.

Un dezenn war an ejiptologiezh he deus graet Izold Gwegan. Emañ bremañ oc'h ober un dezenn all met diwar-benn ereadurezh ar brezhoneg ar wezh-mañ, e skol-veur Roazhon 2. En abadenn-mañ e komz deomp ivez eus an emsav "Yes Breizh" hag eus an aridennad prezegennoù kinniget gant ar C'hereden e Lokarn diwar danvez Breizh, "Apprendre la Bretagne".
Ur pennad-kaoz enrollet e studio Radio Treger Goueloù d'ar yaou 11 a viz Kerdu 2025

Nedeleg ar skrivagnerien a oa bet d’ar sul 30 a viz Du 2025 e Ti ar Vro Gwengamp.
Un digarez e oa bet evit un toullad skrivagnerien d’en em gavout asambles, da zebriñ merenn ha da glakenniñ an eil re gant ar re all. Deuet e oa tud da gontañ kaozioù gante goude-se ha da brenañ levrioù digante. Hag ar bloaz-mañ e oa bet aozet un tamm abadenn disklipañ barzhonegoù war ar marc'had. Kaer e oa bet ar jeu na posubl e oa bet aozet an traoù war an tomm un tammig hag e oa bet re verr an amzer da reiñ an tu d’an holl dud a faote dezhe lâret o zamm da zont war al leurenn…
A bep seurt traoù a oa bet klevet, traoù bet savet pe troet er c’hantved-mañ peurvuiañ, kement ha lâret eo bev buhezek ar varzhoniezh vrezhonek !
An eil war-lerc’h egile (pe eben) e vo klevet ganeoc’h : Louis-Jacques Suignard, Frañsez Favereau, Magali Baron, Mark Kerrain, Enora De Parscau, Mari-Elen Morvan, Klariz Bailleul, Jef Fulup, Herve ar Beg, Gael Roblin pe c’hoazh Herve Seubil Gernaodour.

Plijadur oa bet e fin miz Gwengolo 2025 e ti Maria Gwegen e Koad Gwegen e Plounevez-Moedeg. He mouezh a vo klevet herie adarre evit un eil abadenn. Da gomz deus ar balioù ha pardonioù, deus ar mod he devoa desket konduiñ trakteur hag oto hec’h unan kazi awalc’h pa oa marvet he gwaz...deus ar brezhoneg e vo komzet ivez un tamm bennaket ha deus un dra kazus da vat a zo arri ganti da heul ar c’hovid.
Trugarez da Awen Prijant ha Treveur ar C’halvez o deus bountet ac’hanon da vont da welet Maria Gwegen.

E Koad Gwegen omp herie, e Plounevez-Moedeg. Ec’h amp da welet Maria Gwegen a zo bet o terc’hen menaj en Tirienoù.
En Tirienoù-se bremañ emañ Treveur ar C’halvez o sevel moc’h bio. Goude ober un tamm kont gant Treveur ec’h efomp ouzh taol da gontañ kaoz gant Maria e-skeud ober selloù a gorn etrezek an nor digor da sellet ouzh an dud a zo o tremen war an hent, war o zreid pe war o zrakteur…
En abadenn gentañ-mañ e komzo Maria demp deus he bugaleaj, deus ar maleur a oa arruet gant he zad pe c’hoazh deus ar brezel diwezhañ.
Un abadenn enrollet e miz Gwengolo 2025 gant Tomaz Laquaine-Jakez

Gouel an diskar-amzer a vo disul 16 a viz Du e bourk ar Chapel-Nevez !
Un digarez da gomz eus al labourioù bras a zo e Ti ar C'hoadoù er mare-mañ met ivez eus buhez ar gevredigezh, e-skeud kinnig dre ar munud programm an devezh kaer da zont.
Gant Rozenn an Dreo, renerez Ti ar C'hoadoù.

La chanson populaire de tradition orale en langue bretonne. Contribution à l’établissement d’un catalogue gant Patrick Malrieu.
Ar c’hanaouennoù brezhonek n’o devoa roll ebet araok na stagje Patrick Malrieu da sevel unan diwarne. Betek e varv e 2019 en devoa kendalc’het da binvidikaat e labour tezenn goude ma vije bet soutenet gantañ e miz C’hwevrer 1998. Hag e c’haller lenn ar mell labour-se war baper abaoe miz Gwengolo 2025, a-drugarez d’ar gevredigezh Dastum ha d’ar PUR, Ti-embann skol-veur Roazhon 2. Ur stumm paper eus labour Patrick Malrieu ac’h a da glokaat al labour bet lakaet enlinenn gantañ war [kan.bzh] (http://kan.bzh) gant sikour Didier Bécam ha Nolwenn Morvan.
Pennad-kaoz gant Kristian Rivoalen eus ar gevredigezh Dastum.
DIELL-SON : Padrig Malrieu bet aterset gant Noelle Simon eus Radio Kreiz Breizh e miz Meurzh 1998
Kronikenn Barzhaz gant Magali Baron : dastumad danevelloù "Gwalarn, 100 vloaz"
D’ar sadorn 13 a viz Gwnegolo 2025 e oa bet enrollet un abadenn e galleg dirak ur publik niverus e Ti ar Vro Gwengamp, gant sikour Kristian Rivoalen, Ronan Guéblez, Goulc'hen Malrieu, Nolwenn Morvan, Véronique Pérennou, Vincent Morel, Erik Marchand, Korentin Le Davay ha Marthe Vassallo.
Un abadenn da adselaou [AZE] (https://www.radiobreizh.bzh/episode/75969) .