Peoc'h ba'l loch !

Elouan ar C'houlz, paotr ar violoñs er strollad Zoñj, a ginnig deomp o fladenn nevez anvet Koar.
Mouezh ar ganerez Añjela Lorho-Pasco a vo klevet en abadenn ivez !
Sonerezh
A temps perdus - Ridée 6 temps
Feniciia - Laridé 8 temps
Scottish al Logelloù
Poltred gant Alwena ar Gall

"Peoc'h ba'l loch" kostez Plourac’h ha Lohueg ar wezh-mañ.
Baleadennoù berr zo bet kinniget eno e-pad an hañv gant ar C’hontrad Lec’hel a Yec’hed (CLS) savet gant
Gwengamp-Pempoull Tolpad-kêrioù (GPA) ha Leñv Arvor Kumuniezh (LAC).
Un tamm kenlabour gant ar CRT, ar Greizenn Dafar evit an dud Oajet, ha setu lakaet war-droad 7 baleadennig. Troiadoù komod d’an holl ha buhezet gant ur buhezour a-vicher.
Krog e oa ar jeu e penn kentañ miz Gouere gant harp tud ar gevredigezh D2 (Dynamique et Développement) emañ he zi e Kallag.
Met ar re-se o deus un ti war rodoù ivez, an Ti Koad a vez graet deusañ.
E-pad pemzektez betek digwener 7 a viz Eost e oa an ti bihan koant-se war ar parking eeun da di-kêr Plourac’h.
D'ar gwener-se a viz Eost ne oa ket bet displijus an traoù, sur deoc’h ! Degemeret an dud gant kafe ha kachennoù ha mousc’hoarzhoù e-leizh...
Tud aterset : Aline ar Barzh, Thierry hag Alain eus Plourac'h
Un abadenn enrollet d'ar 7 a viz Eost 2026 gant Tomaz Laquaine-Jacq
Ur gelaouadenn da gavout ivez war lec'hienn [Gwengamp-Pempoull Tolpad Kêrioù] (https://www.guingamp-paimpol-agglo.bzh/actualite/balades-estivales-animees/?fbclid=IwY2xjawUDu6BwZG9mAWV4dG4DYWVtAjEwAGJyaWQRMEFyNDc5Nmd1b05VNmNUbzdzcnRjBmFwcF9pZBAyMjIwMzkxNzg4MjAwODkyAAEeH_s3ZL0Q1EBTmoFdYz2LxvYEF28BPophP9wj5CUnRPP2fkNQSRcAiDAZisk_aem_rGNKM4hqte9xrcbf03KviA) .

Kokouz ha palourd prizius, seurezed drouk, bec’h gant ar vamm-gozh diwar laezh-ribod, bugeleziz e-leizh war bagoù, ur gwaz o navigañ pell, gourou ar saout war ar wern… E Perwenan emaomp herie e kompagnunezh Louiz Grasiet ha Herve ar Bihan. Trugarez vras dezhe !
Un abadenn enrollet e miz Mae 2026 gant Tomaz Laquaine-Jakez

"An Dreverz" gant Toni Galmés hag embannet gant [Timilenn] (https://timilenn.wordpress.com/) zo bet troet diwar ar c'hatalaneg gant Fañch Oger a vo klevet en abadenn-mañ !
Da nozvezh an Nedeleg e 1914, e deroù ar Brezel-bed Kentañ, soudarded hag a oa o stourm e trañcheoù kalon Europa a zisklêrias un harz-tennañ hag a baouezas gant an emgannoù...
Ur pennad-kaoz enrollet e miz Ebrel 2026 gant Tomaz Laquaine-Jakez

Eus un torkad pennadoù e vo komzet en abadenn-mañ. Kronikennoù anezhe da gentañ. Bet embannet a sizhun da sizhun gant Herve Bihan war lec'hienn ti-kêr an Trevoù. A bep seurt danvez ac'h a d'ober ar re-seoù met diwar-benn Gwalarn hag e skrivagnerien zo kaoz dreist-holl e-barzh Pa c'hwezh avel hon lennegezh : Gwalarn, levrenn 1 (An Alarc'h Embannadurioù). Splujomp e-barzh oberenn Gwalarn da heul un den gwrac'h gant al lennegezh vrezhonek...
Un abadenn enrollet e miz Meurzh 2026 gant Tomaz Laquaine-Jakez

An Dictionnaire des monts d’Arrée zo ur mell levr kaer a oa bet embannet e ti Skol Vreizh e miz Here 2025. Ul labour vras bet kenurzhiet gant François de Beaulieu ha bet bouetet gant ur pevar-ugent den bennaket. Memor, gouiziegezh, karantez e-keñver Menez Are... Un ostilh brav da reiñ an tu d'ar re a zo o chom aze pell zo, d'ar re a zo o paouez ober gwrizioù eno ha d'an holl re a zo dedennet gant an terouer-se, d'anavezout gwelloc'h an takad hag an dud a zo o chom warnañ.
Tost da 800 pajennad, ouzhpenn 500 pennad, en tu all da 900 skeudenn pe boltred, ur sell a dost war ar 16 kumun ac’h a d’ober "Ar Menez", glad naturel, glad savet, glad sevenadurel, ar vuhez sokial, ar politikerezh hag an ekonomiezh ar ragistor hag an istor, al lec’hioù hag an dud vrudet… etre dec’h hag arc’hoazh..
En abadenn e vo klevet Yann-Luk ar C'hloareg (Skol Vreizh) bet aterset e-skeud saloñs levrioù Plistin e miz Du 2025 ha Paskal Rannou bet goulennataet e Rostrenn e miz Kerdu 2025.

Herie ec’h efomp da Blounevez-Moedeg adarre. Betek ti Frañsin ar C’hamm bet ganet er bloaz 1936. Eil lodenn ar gaoz a vo klevet. Diwar ar brezel e vo komzet, ar balioù dindan ar brezel, milinoù paper Benac’h. Diwar evurusti ha paourentez, akordeoñs, kanañ ha kanañ c’hoazh (e brezhoneg hag en galleg), Meurzh al lard, pouleoù laeret ha kalz a draoù all c’hoazh...
En deiz-se eus kreiz miz Meurzh 2026 e oa ganemp ivez Josette hag If Fulup, kamaradoù da Frañsin, hag ivez Laurence, merc’h Frañsin ha Remi, he mab-kaer. Trugarez vras dezhe holl evit an degemer deus ar c’hentañ tout !

Herie ec’h efomp da Blounevez-Moedeg. Mont a refomp di da gontañ kaozioù gant Frañsin ar C’hamm bet ganet er bloaz 1936. E-pad div abadenn e vefomp ganti da gomz deus yaouankiz ha kozhni, karantez, c’hoari-pezh, balioù, kanaouennoù… ha deus bale ha bale c’hoazh war garheñchoù ar vuhez !
En deiz-se eus miz Meurzh 2026 (fresk an amzer en deiz-se !) e oa deuet ivez Josette hag If Fulup, kamaradoù da Frañsin. If a vo klevet dreist-holl. Darn a soñjo marteze o klevet ar gaoz e oa bet lâret a bep sort, re gamm ha re dort ! Laurence, merc’h Frañsin a oa ganemp ivez. Tan dezhi evit un eur gentañ a abadenn. Esperañs ‘m eus ho po kement a blijadur o selaou evel ma ‘m oa me bet oc’h ober anaouegezh gant Frañsin ar C’hamm.
Abadenn enrollet e miz Meurzh 2026 e Plounevez-Moedeg gant Tomaz Laquaine-Jakez

D'ar yaou 7 ha d'ar gwener 8 a viz Mae e vo roet lañs d'ar Redadeg evit ar brezhoneg e Lannuon. Ur fest kaer da voulc'hañ ur c'haloupadeg a gaso rederezed ha rederien betek an Naoned d'ar sadorn 16 a viz Mae.
Morgane ha Yoann An Eostig-Kervran a gomz deomp eus gouel al loc'hañ hag eus ar Redadeg e Bro-Dreger.
Pennad-kaoz enrollet d'ar 14 a viz Ebrel 2026 e Gwengamp

Nevez zo eo krog Herve Seubil gKernaudour da skrivañ romantoù diwar avañturioù ur vandennad krennarded. "Dindan pavezioù Gwengamp" a oa bet embannet e 2024. E-barzh "A-drek kerreg Tevrieg" (2025) e rank Edern ha peurrest ar vandennad dirouestlañ kevrinoù war un enezenn e-maez da Blougouskant...
"A-drek kerreg Tevrieg", ur romant embannet gant An Alarc'h Embannadurioù